الفترة الأخيرة سمعنا كتير كلمة “برودرلاين” أو “شخصية حدية”، وبقينا بنشوف ناس كتير بتشخص نفسها أو غيرها بالوصف ده. بس الحقيقة الموضوع مش مجرد “مود قفل” أو “زعل شوية”، الموضوع أعمق بكتير.
يعني إيه شخصية حدية أصلاً؟ .
ببساطة، الشخصية دي عايشة حياتها على “الطرف” أو “الحد”، مفيش منطقة وسط. يا فوق قوي يا تحت قوي. هي نمط حياة من عدم الاستقرار في المشاعر، في العلاقات، وحتى في نظرتهم لنفسهم.
خمس علامات لو شفتهم تعرف إنك قدام (شخصية حدية) .
مشاعر “أوفر” ومتقلبة
أهم حاجة بتميزهم إن مشاعرهم داماً “فياضة” بزيادة. ممكن يبدأ اليوم وهو في قمة السعادة والانبساط، وفجأة وبدون سبب واضح، المود يقلب 180 درجة لضيق وزعل ملوش آخر. رد فعلهم العاطفي غالباً بيكون أكبر بكتير من الموقف اللي حصل.
الاندفاع.. “فعل فاضح في لحظة شعور”
!الشخصية الحدية مابتفكرش مرتين. لو حس بحاجة دلوقتي، هينفذها فوراً
يقرر يسيب الشغل فجأة.
يشتري حاجات غالية جداً ملوش حتى لو مش محتاجها.
يبدأ رياضة أو هواية جديدة النهاردة، وبكرة يزهق منها، القرار عندهم وليد اللحظة والمشاعر، مش الحسابات والمنطق.
(العلاقات) .. يا ملاك يا شيطان!
علاقاتهم عاملة زي “العملة” ملك وكتابة:
مرحلة الانبهار: في الأول بيشوفك أحسن حد في الدنيا، بيغرقك حب واهتمام، وإنت بالنسبة له “الملاك” اللي مبيغلطش.
مرحلة القلبة: أول ما يحصل خلاف بسيط أو يحس إنك مش مهتم بيه، الصورة بتتهز فوراً، وتتحول في نظره لأسوأ شخص في العالم وتبدأ مرحلة البعد والخصام.
“أنا حاسس” هي اللي بتمشيني
لو جيت تتناقش مع حد شخصيته حدية، هتلاقي كلمة واحدة مسيطرة: “أنا حاسس”. مبيعرفش يقول “أنا فكرت في الموقف ولقيت كذا”، هو محكوم بمشاعره بس. وبالنسبة له، مشاعره دي حقيقة مطلقة لازم الكل يحترمها ويقدرها، حتى لو مش ماشية مع المنطق.
شطار جداً في شغلهم،.. مفاجأة مش كده؟
رغم كل اللخبطة العاطفية دي، الشخصية الحدية غالباً بتكون ناجحة جداً في الشغل. ناس مبدعة، لسانها حلو، وبيقدروا يعبروا عن نفسهم ببراعة. مشكلتهم الحقيقية بتبان في “العلاقات القريبة” (جواز، صحاب، أهل)، لكن في التعامل الرسمي بيبقوا زي الفل.
ليه بيحصل كده؟
الدكتورة منى وضحت إن الجذور غالباً بتكون من الطفولة. لما الطفل مبيلاقيش “احتواء” أو “قبول” من أهله زي ما هو، بيطلع يدور على القبول ده في كل الناس وهو كبير، وبسبب خوفه من الرفض، بيعمل ردود أفعال عنيفة أو مندفعة.
!كلمة أخيرة من الدكتورة منى رضا
التعامل مع الشخصية دي محتاج “حذر” وفي نفس الوقت “اهتمام”. لو حاسس إن الكلام ده بينطبق عليك أو على حد قريب منك، متقلقش، الفهم هو أول طريق العلاج.
