ليه الصحة النفسية مهمة ؟
صحتنا النفسية جزء اساسي مننا وبيعكس آراءنا و شخصيتنا و نظرتنا للحياة عشان كده لازم نهتم بيها لانها بتكون ديما الدافع اللي بيحركك تواجه الحياة ، تتعلم وتشتغل احسن و بتخليك دايما تاخد القرارات المناسبة ليك و تنتج بشكل احسن
كمان لما نحافظ على صحتنا النفسية ده يحمينا من امراض كتير ممكن نكون عرضة ليها ، عشان كده هنناقش ايه اهمية الصحة النفسية؟ ايه العلامات اللي بتدل على تدهور صحتنا النفسية؟ و ازاي نحافظ عليها؟
ايه أهمية الصحة النفسية ؟
الصحة النفسية ليها أثر على جميع جوانب الحياة وبترتبط ارتباط مباشر بالصحة الجسدية
- تحسين صحة الجسد: للصحة النفسية تأثير كبير في صحة الجسد و اهمالها بيزود احتمال الإصابة بالأمراض المزمنة زي أمراض القلب والسكر
- تحسين جودة النوم : اضطرابات النوم من ضمن المشكلات بتربطها علاقة مباشرة بالصحة النفسية زى الأرق، الاكتئاب والضغط النفسي
- رفع مستوى الطاقة: الفترات اللي بتمر فيها بأزمات نفسية صعبة دايما بتحس بارهاق و خمول وتعب و ده عشان طاقتك بتتاثر بصحتك النفسية و ده السبب اللي بيخليك تحس انك مستنزف
- تغير منظور الحياة : لما صحتك النفسية بتكون في حالة كويسة ده بيساعدك تشوف المواقف والصعوبات بمنظور مختلف و متفائل اكتر فديما بيبقي عندك قابلة للتعامل وتخطي الأزمات
- الحفاظ علي وزن صحي: الصحة النفسية بتساعدك تحافظ علي نمط حياتك بشكل صحي و متوازن و بتحميك من الزيادة في الوزن وعلشان كده بتلاحظ ان الناس اللي بتمر بأزمات نفسية ديما وزنها بيزيد لانها بتهمل الرياضة و الاكل الصحي
- تجنب العادات السيئة: كتير من الناس اللي بيمرو بازمات نفسية بيحاولو يتهربو من الحقيقة عن طريق عادات مضرة زي التدخين او بيروحو للحل السريع و هو الادوية المهدئة من غير استشارة طبيب مختص و ده بيكون له جوانب سلبية كتير
طب إيه العلامات اللي اقدر اعرف منها أن صحتي النفسية بتتدهور ؟
ايه العلامات الي نعرف منها تدهور الصحة النفسية؟
تدهور الصحة النفسية له اشارات و دلالات كتيرة بتاثر علي طاقتك، نومك و حتي صحتك
- دايما بتحس بالحزن و الاكتئاب
- مزاجك بيتغير بشكل سريع
- بتنام كتير و طاقتك ديما قليلة
- بتحس بالذنب بشكل كبير
- تفكير ديما مشوش ومش بتقدر تركز بشكل كبير
- تغير في عادات أكلك
- الغضب الشديد
- قدرتك انك تواجه المشاكل اليومية بتقل
دي كلها أعراض بتواجه الشخص اللي بيمر بتدهور في صحته النفسية ،فلو انت بتواجه بعض الاعراض دي يبقى لازم تدور ايه العادات اللي تقدر من خلالها تحسن من صحتك النفسية
ازاي تهتم بصحتك بشكل يومي ؟
الاهتمام بصحتنا النفسية اولويه عشان كده لازن نتعلم ازاي نحافظ عليها وفي اكتر من طريقة عشان نقدر نعمل ده زي مثلا:
- نام وقت كفاية: النوم من أهم العوامل اللي بتأثر علي الصحة النفسية عشان كده مهم اننا ناخد كفايتنا من النوم لانه بيساعد ان خلايا مخنا و جسمنا تتجدد و ده بيساعدك تحافظ على صحتك النفسية
- خطط ليومك : وقت الفراغ اللي عند بيدك مساحة تفكر في الحاجات اللي بتضايقك عشان كده متسبش فرصة للفراغ يتغلب عليك خطط ليومك و اعرف انت عايز تعمل ايه
- تواصل مع الطبيعة: احساسنا بالطبيعة اللي حوالينا ديما بتسيب اثر ايجابي فينا و بتخلينا نحس احسن عشان ، الآن حواسنا لما بتواصل مع الطبيعة زي انها تستمتع بأشعة الشمس ، الهوا اللي بيخليك تحس انك بتتنفس او ان رجلك تلمس الارض دي كلها احاسيس بتعزز علاقتك بالطبيعة
- قدم مساعدات : لو لقيت صاحبك، جارك، زميلك او حتى حد متعرفوش محتاج مساعدة ما تترددش انك تساعدة الان ده بيخليك تحس احساس كويس تجاه نفسك و تكتشف نفسك اكتر
- العب رياضة: انك تخلي الرياضة جزء أساسي من يومك ده بيساعدك جدا انك تتخلص من الطاقة السلبية اللى بتحس بيها خلال اليوم ورياضة زي اليوجا والتأمل تقدر تساعدك في تحسين صحتك النفسية والجسدية بنسبة كبيرة
- اتعلم حاجة جديدة: تعليم مهارة جديدة او رياضة او انك تجرب حاجة انك كنت خايف منها و معندكش الجرأه انك تعملها ده جانب من حبك لنفسك انك عايز تبقي احسن و تحسن صحتك الذهنية
- اتعامل مع الضغوطات : اعرف ايه اللي بيخليك مضغوط و ايه رد فعلك تجاه الضغط و ازاي تتعامل مع غضبك ومع الوقت هتبدا تفهم ازاي تتعامل مع الضغوطات و تخرج منها اسرع من غير ما تاثر بالسلب على نفسك
